BUKU UPACARA PERKAWINAN (BAHASA PAKPAK)

BUKU
ATUREN PERJEJAPEN

 

Pernikahan

Pernikahan

 

GEREJA KATOLIK
Paroki Maria Pertolongan Orang Kristen
Sidikalang

 I.  KIPEMA DEKKET MEMEREKAN SINAING JEJAP

1. Menjalo sinaing jejap

(Pastor dekket mesdinar marang pè pengendeng ni kuria memèma rombongen sinaing merkejejapen i lebbe pèntu ni gereja)

Pastor  :    Njuah-njuah mendahi kènè  karina, terlebih mendahi kènè sidua,  masèh niatè, dekket damè engket keleng ni Tuhanta memereken   pasu-pasu-Na mendahi kita karina.

Umat    :           Bagèndari dekket soh mi sidekah ni dekahna.

2. Memereken sinaing jejap  (partua marangpe mewakili orangtua sinaing jejap)

Wakil Orangtua: Pastor sikuhormati  kami, kami partua sinaing jejap kipesoh anak nami engket berru nami, lako menjalo Sakramèn perumahtanggan. Kami mengido mendahiken Pastor imo sebagai wakil Gereja, nggèut meneguhken keleng ni atè  kalak èn sidua janah mengido pasu-pasu ni Tuhanta ibagasen Sakramèn Perumahtanggan simende.

Pastor       :   Sampang ngo atè ngku, aku mewakili ibagasen gerar ni Gerèja menjalo janah menguèi pengidon ndene lako kisohken janah kipehot perumahtanggan kalak èn sidua bagè aturen Gerèja dekket iman katolik. Kumerna nai rebak mo kita mengidoken mendahi Dèbata Bapa benna ni karina keleng janah mengidoken pasu-pasuNa mendahi kalak èn sidua.

(Pastor memispis sinaing jejap)(Pastor, sinaing menjalo pasu-pasu, orangtua engket saksi merbaris mi lebbe langgaten, janah merende, Koor)

II. LITURGI  PERLEBBE

1. Tanda Silang dekket pembukaan

Pastor       :   Ibagasen gerar ni Bapa engket Anak dekket Tendi Simbadia

Umat         :   Amèn.

Pastor       :   Masèh ni atè  Tuhanta Yèsus Kristus, engket keleng atè  ni Dèbata Bapa dekket persadaan Tendi Perbadia mendengani kita karina.

Umat         :   Bagèndari soh mi sidekah ni dekahna.

Pastor       :   Kene sidua sinaing jejap, bagèndari kènè sidua enggo roh lako mengidoken asa keleng ndènè sidua asa i pasu-pasu ni Tuhanta i jolo ni umatNa. Pasu-pasu deket keleng atè simende kalon taba kènè sidua sada tanda Sakramèn simendè perkiroh ni Tuhanta i tengah-tengah rumahtangga sinaing i tempuh  kènè sidua. Kumerna ni nggèut ngo Tuhan mendengani rumahtangga ndene janah kipehot dekket kipasu-pasu rumahtangga simende memaing pepadanen perumahtanggan ndènè imo sada tanda persadan ni Kristus dekket Gerèja, bagè ndari deket soh mi sidekah ni dekahna. 

2. Mengaku dosa, menelseli dosa (Aku Merpadan)

Pastor       :   Kènè karina sini kekelengen nderang madèng acara pemasu-masun i tubennai, sinok mo kita sikejap sipemendè mo perukurenta, lako menelseli dosanta, asa mende kita janah patut menjalo pasu-pasu ibagasen ulan Simbadia èn terlebih mendahi sinaing jejap èn.

Umat         :   Aku merpadan mi Debata sipergegoh kalohon, dekket mendahi kenen pe ale dengen kumerna perdosa situhu-tuhu ngo aku, merkite pikiren, kata, perulan, deket mbue kekurangen. Merkiteken salahku, salahku,s alahku simbelgahna kumerna i, kuelek-elek Maria Simbadia janah dak tong simada mersakor dosa, dekket malekat dekket kalak simbadia, janah bagi ma pe kene ale dengan, asa sodipken kene aku mi Tuhan Debanta.

Pastor  :           Dak mermasèh atè mo Dèbata sipergegoh kalohon i mendahi kita, i sèsa mo karina dosanta janah i tegu-tegu mo kita mi kenggeluhen sidekah ni dekahna.

Umat         :   Amèn.

3. Alè Tuhan masèh atè-Mu kami

Pastor       :   Ale Tuhan, masih atèMu midah kami.

Umat        :   Ale Tuhan, masih ateMu midah kami.

Pastor       :   Ale Kristus, masih atèMu midah kami.

Umat        :   Ale Kristus, masih ateMu midah kami.

Pastor       :   Ale Tuhan, masih atèMu  midah kami 

Umat        :   Ale Tuhan, masih ateMu  midah kami

 Kemulian (oda pella ibaingken)

4. Sodip Pertebenan

Pastor       :   Alè Dèbata Permasèh atè, Kono ngo memaingken keleng ni atè mendahiken sinaing jejap èn, imo Rumahtangga memaing sada tanda kesadan mendahi Ko engket kami, ni tebus-Mu. Tengen mo kalak èn sidua……………………………engket……………………….sinaing menempuh rumahtangga sirembaru. Dak tong mo pasu-pasuMu engket lemmoMu sambing mo mendengani lolo janah senang dekket mendengani iperdalanen nggelluh Rumahtangga kalak èn. Bereken mo pasu-pasuMu mendahi kami karina sipulung èn, asa patut kami menjalo perkirohMu segen. Merkitèken Jèsus Kristus, AnakMu Tuhan singgeluh janah simerkuasa bagèndari soh mi sidekah ni dekahna.

Umat         :   Amèn.

III. SIDENGKOHKEN MO KATA NI TUHANTA

1. Penjakaen Perlebbe                                                              Ef. 5:2;21-23

                     Perangèken kènè mo ngkelleng i bagè Kristus sienggo mengkekelengi kita. Iberrèken ngo diriNa mengkepkep kita, mahan luah janah pèlèen baungkus pesennangken atè Dèbata.  Mersiuè-uèen mo kènè ibagasen merkebiaren midah Kristus.  Iuèi sinibages mo sinibalèna bagè penguèina bai Tuhan i.    Ai sinibalè i ngo takal si nibagesna, bagè Kristus takal Kuria i, janah ia ma ngo Sipaluah i kuria sienggo terdokken dagingNa.  (Bagimo ipermongkami Dèbata kita sidarièn)

Umat    :           Lias ate mo bai Debata.

2. Psalmèn marangpè merendè lako penjakaen

3. Solo-solo lako menjakaken èvangelum

Pastor       :   Alèluya, Alèluya, Alèluya

Umat         :   Alèluya, Alèluya, Alèluya

Pastor       :   Si enggo ni pedemu ni Debata oda ndorok sirangen ni jelma.

Umat         :   Alèluya, Alèluya, Alèluya

4. Menjakaken Evangelum (Matèus 19 : 3-8)

Pastor       :   Tuhan mendengani kita

Umat         :   Bagèndari soh mi sidekah ni dekahna

Pastor       :   En mo sukuten keluahen Jèsus Kristus sini suratken Simbadia SiMatèus

Umat         :   Sini poji mo Kono alè Tuhan

Pastor       :   Nai roh mo kalak Parisè naing mencuba Jesus. Ikusoken kalak i mo, “Bakunè ndorok ngo kalak menirangken sinibagesna mengèkutken hatoren agamanta barang merkitè alasen kadè pe?”   Ialoi Jesus mo, “Oda ngo pennah ijaka kè ibas Bibèl, ai daholi dekket daberru ngo jelma itempa situmempai i mulana i?  Kessa i idokken nola ma mo, ‘Kumarna nai, kennah itadingken anak laki ngo partuana lako mendahiken sinibagesna asa gabè sada kalak i sidua.’Asa oda ngo kalak idi dua kalak nèngè, tapi sada ngo. Kumarna nai, jelma i mak ndorok menirang barang kadè sienggo ni peddemmu Dèbata.” Nai ikusoken kalak Parisè dèng ma mo tabaSa, “Mula bagi ngo kasa idokken si Musa, berèenken mo surat sirang lako menirangken?” Nai mènter idokken Jesus mo taba kalak i, “Kerna ni jahat ndènè ngo memmaing asa ibelli si Musa kènè menirangken sinibages ndènè; tapi oda kin ngo bagidi arnia i

Pastor       :   Bagimo sukuten keluahen sinipeterang mendahi kita sidarièn

Umat         :   Sini poji mo Ko alè Tuhan

5. Jamita

6. Syahadat

IV. PEHOTKEN

PERPADANEN/PERKAWINEN

Pastor       :   Kènè karina dengan sini kekelengen, dapet mo tikkina bagèndari, mendahi sinaing jejap memagahken mbagak ni atena janah mengido dekket pehotken perpadanen kalak èn sidua.

1. Memagahken niat, marang mbelgah ni atè lako jejap

Pengantin sidua :  Pastor sikuhormati kami, ukum kami sidua enggo mersada ni atè dekket memilih nalako denganku   enggeluh ibagasen ncerrep ni ukur. Bagèndari kami roh mengido mendahi Pastor asa enggeut kipasu-pasu, kisahken dekket pehotken kelleng atè nami èn imo Ripè  Simbadia, ibagasen sada perpadanen Ripè Simbadia janah oda boi i sirangken menurut aturen Gerèja Katolik.

Pastor       :   Lias atè mo kerna mbersih ni ukur ndènè sidua. Perlebbè aku mengkusoi mendahi saksi . Kènè saksi  sikuhormati, menurut pemettoh ndènè, lot ngo hambaten mendahi kalak èn sinaing jejap menurut peraturen dekket kebiasan Gerèja Katolik?

Saksi         :   Menurut sikubettoh kami, oda lot hambaten lako kipasu-pasu kalak èn sidua. Kerna ni kami karina saksi kipertuhu pengidon kalak en sidua.

Pastor       :   Lias atè mendahi kènè saksi.

2. Mendokken lias atè, mengido mohon maaf dekket sodip mendahi orangtua.

Pastor       :   Kènè sidua simerlolo ni atè, kumerna enggo ibaing kuso-kuso siperlu kalohon janah i lebbe saksi sebage pejabat gerèja, aku menguèi pengidon ndènè sidua. Nderang madèng kènè kupasu-pasu dekket kuresmiken, aku memerèken waktu mendahi kènè sidua, mendahi orangtua lako mendokken lias ate. mohon maaf dekket mengido sodip mendahi kalak i nai.

(duana sinaing menjalo pasu-pasu mendahi orangtua, mersembah  i lebbe kalak i enggo kessa sidung balik mo mi bekkas perlebbe)

3. Padan, janji perumahtanggan duana sinaing jejap

Pastor       :   Pengantin simerlolo ni atè, enggo ke roh mi Gereja en lako kisahken perjejapen i jolo ni pengula ni kuria, dekket i saksiken umat simerkepercayan. Tuhan Jesus Kristus memasu-masu dekket peteguhken kene, asa tellap kene  mersikekelengen dekket menunaikan tanggungjawab ipas enggeluh i perumahtanggan ndene.

Kuso-kuso mendahi Mempelai Daholi

Pastor       :   ………………………mersedia ngno ko meresmiken perjejapen èn ibagasen  roka sintutus janah tuhu-tuhu?

M. Daholi      :   Mersedia ngo aku.

Pastor       :   enggèut ngo ko  mengkekelengi dekket menghormati pertua ibagesmu sindekah ko enggeluh?

M. Daholi      :   enggèut ngo aku

Pastor       :   enggèut ngo ko jadi bapa simende meradepken anak dekket berru si naing i pesoh Debata mendahi kènè, janah menegu-negu kalak idi jadi Kristèn si senteng?

M. Pria      :   enggèut ngo aku.

Kuso-kuso mendahi Mempelai Daberru

Pastor       :   …………….mersedia ngno ko meresmiken perjejapen èn ibagasen  roka sintutus janah tuhu-tuhu?

M. Daberru  :   Mersedia ngo aku.

Pastor       :   enggèut ngo ko  mengkekelengi dekket menghormati pertua ibalèmu sindekahna ko enggèluh?

M. Daberru  :   enggèut ngo aku

Pastor       :   enggèut ngo ko jadi  inang simende meradepken anak dekket berru si naing i pesoh Debata mendahi kènè, janah menegu-negu kalak idi jadi Kristèn si senteng?

M. Daberru  :   enggèut ngo aku.

sidung i pastor mengkusoi sinaing jejap

Pastor       :   enggèut ngo kènè sidua sebagai suami-isteri katolik menunaiken kewajiban-kewajiban ibagasen enggèuh perjejapen dekket pendasi enggèluh i perumahtanggan ndènè, marang pè i Gereja dekket ijolo-jolo ni dengan sakuta ?

Kedua mempelai : enggeut ngo kami

Pastor       :   Pengantin simerlolo ni atè, nderang madèng aku kisahken perjejapen èn, aku mendokken mendahi kènè, gennep mo kènè mendokken mbersih ni ukur ndènè engket kelleng atè ndènè, janah mendokken padan, janji perumahtanggan ndènè janah mersicèkèpen tangan janah mengampèken i babo Bibèl èn, kerna ibagasen tersurat ngo kata ni Tuhanta Jesus Kristus, benna ni kepercayaan dekket pendasi enggeluh perumahtanggan ndènè. Mendahi kènè karina siroh, cender mo kita lako menghormati perpadanen, janji perumahtanggan kalak èn sidua.

PADAN SIDAHOLI :

 ………………………………….aku memilih ko menjadi pertua ibages. Aku merjanji ibagasen ukur mbersih dak tong kelleng atèngku bamu nderang susah dekket senang, nderang njuah-njuahen dekket mersakit ibagasen ukur mbersih, kennah kukelengi , janah kupesangap sindekah aku enggeluh. Janah aku merpadan kennah menjadi pertua ibalè dekket bapa simende mendahi anak-anak siniberèken Tuhan lako kiajari ia, janah kristèn siburju. Bagimo perpadanen èn, kupadanken mendahi Ko………………………………(gerar sidaberru) ibagasen gerar ni Tuhan dekket buku Simbadia èn.

PADAN SIDABERRU:

 …………………………….aku memilih kono menjadi pertua ibalengku. Aku merpadan kennah burju taba kono nderang susah dekket senang, nderang mersakit dekket njuah-njuahen ibas mbersih ni ukur kennah kukelengi janah kupesangap kono sindekah aku enggeluh. Janah aku merpadan kennah menjadi inang siburju dekket mendè mendahi anak-anak sini berèken Tuhan lako kiajari ia asa kalak Kristèn simendè. Bagimo perpadanen èn kudokken mendahi kono…………………………..(gerar sidaholi) ibagasen gerar ni Tuhan dekket buku Simbadia en.

4. Pehotken sinaing jejap/pernikahen

Pastor       :   Ibagasen gereja ni Tuhan, i lebbe ni saksi, orangtua ndene sidua sinaing jejap, sendihi ni kuria sipercaya, aku mendokken perjejapen èn, perjejapen Katolik situhunna, merkitè Sakramèn Perjejapen èn. En mo benna kegegohen ndene sidua ibagasen Ripè ndene. Mulai bagèndari nai dak tong mo pasu-pasu ni Tuhan i mendengani rumah tangga ndènè ibagasen gerar ni Bapa dekket Anak dekket Tendi Simbadia, amèn.

Pastor       :   Si enggo ipedemmu ni Debata

Umat         :   Oda boi sirangen ni jelma.

5. Kipasu-pasu dekket memereken cincin dengan perjejapen.

Pastor       :   Mersodip mo kita,    Alè Pa, benna kekelengen pasu-pasu mo (+) cincin èn, asa jadi benna keleng ni atè kalak èn sidua merkitèken cincin èn, pesengetken kalak èn keleng ni atè, janah enggèut bagè padan ari sidarièn, merkitèken Kristus Tuhan janah pendengani kami.

Umat         :   Amèn

Pastor       : …………………. bereken mo cincin èn mi jari manis pertua ibagesmu, imo tanda keleng ni atèmu, dekket mbersih ni ukurmu.

M. Daholi  : ………………..(gelar sidaberru), Jalo mo cincin èn imo tanda  kelleng ni atèngku, dekket mbersih ni ukurku taba kono.

Pastor       :  …………………, bereken mo cincin èn mi jari manis pertua ibalèmu imo tanda kelleng ni ate dekket mbersih ni ukurmu.

M. Dabertu   :  ……………….(gelar sidaholi),  jalo mo cincin èn imo tanda kelleng atèngku dekket mbersih ni ukurku mendahi kono.

6. Memasu-masu beras Simpihir ni Tendi dekket oles

Pastor       :   Mersodip mo kita,   Ale Tuhan Debata Bapa nami, Ko ngo dalan pasu-pasu, kenggeluhen, sampang ni ate deket kinibèak. Pasu-pasu mo beras èn imo beras simpihir ni tendi menandaken pasu-pasu kenggeluhen, sampang ni atè dekket kinibèak, bagima dekket oles èn menuduhken kelleng ni atèmu janah dengani mo kami, pasu-pasu (+) beras èn dekket oles èn sinaing kupakkèken kami mendahi sinaing menjalo perjejapen kalak èn sidua. Merkitèken Kristus Tuhan simendèngani kami, Amèn.

(Mendahi partua sinaing jejap kibereken oles mendahi kalak i sidua)

Pastor        :     Kènè……………………dekket……………..jalomo oles èn  sienggo ipasu-pasu dekket janah Tuhan mo mendengani kene  sidua. Ibagasen gerar ni Bapa dekket Anak dekket Tendi Simbadia,     Amèn.

Pastor       :   Mendahi kita kalak batak en mo oles pasu-pasu, tujuanna anggiat mo nggedang umur ndènè janah merketurunen.

(Enggo kessa i Pastor memereken beras mendahi kalak i sidua dekket orangtua

simenjalo pasu-pasu, dekket saksi mewakili pengurus gereja)

Pastor       :   Jalo mo beras simpihir ni Tendi si enggo ipasu-pasu èn imo tanda keleng ni atè ni Tuhan mendahi kita dekket mendahi kènè sidua. Ibagasen gerar ni Bapa dekket Anak dekket Tendi Simbadia, Amen.

7. Sodip pasu-pasu mendahiken pengantin sienggo jejap

Pastor       :   Partua-partua sini kekelengen mersodip mo kita ibagasen ncerrep ni ukur asa roh Tuhan i memereken pasu-pasuNa deket keleng ni ateNa mendahi ripe sirembaru en, si enggo ipesada ibagasen Kristus. Kumerna kalak i enggo i pesada ibagasen perpadanen simende asa dak tong kalak i gabe sada ibagasen keleng ni ate.

Mersodip mo kita, (sinok sikejap)

                     Ale Tuhan Debata nami, Ko ngo menempa karina silot ibagasen kegegohenMu, Ko ngo menempa daholi engket daberru dos engket rupaMu. Ko mango menempa daholi engket daberru asa gabe sada, Ko ngo mengajarken perpadanen perjejapen si enggo i pehot Ko oda boi sirangenken. Tuhan Ko ngo kipasu-pasu perjejapen janah memaing perpadanen perjejapen tanda persadan Kristus engket Gereja. Tengen mo merkiteken maseh ate-Mu ………………………………(daberru) en merkiteken pasu-pasuMu engket keleng ateMu dekket dame si lot i ukurna, asa boi ia gabe inang simende janah rela dekket enggeut menjadi inang siburju dos dekket daberru Simbadia sini poji ibagasen buku Simbadia. Kami pe mersodip mendahi pengantin …………………………..(daholi) en, asa dak tong mo ia merusaha deket mertanggung jawab, taba siukatna kan nadekket dukak-dukakna dekket i tengah-tengah masyarakat. Kami mengido bamu ale Tuhan, Ale Tuhan dak tong mo kalak en sidua ibagasen kepercayan dekket tennahMU. dak tong mo kalak en gabe sada ibagasen rumah tangga, simende janah merandal daholi simende janah mengulaken sellloh i tengah-tengah kalak i. Pehot mo kalak i ibagasen kata ni Buku Simbadia, asa boi kalak i gabe saksi Kristus mendahi karina jelma.  

                     Asa dak tong mo kalak i mende janah meppar, gabe orangtua janah boi i tiru janah merlolo ni ate menengen dukak-dukakna dekket kempu-kempuna. Janah boi kalak i soh sayurntua janah boi kalak i mersampang ate ibagasen kerajan sorga. Merkiteken Kristus Tuhan janah mendengani kami, Amen.

Umat         :   Amen.

(Oles enggo boi ii talksasi

V.  ULAN EKARISTI

1. Sodip Pengidon

Pastor       :   Partua-partua sini kekelengen, mersodip mo kita pesakatken pengidonta mendahi Dèbata Bapa, asa i pesada Rumahtangga sirembaru èn, ibagasen kelleng atè janah mbuè pasu-pasu ni Tuhanta mendahi ia.

Petugas     :   Alè Tuhan, tatap mo kalak èn sidua si enggo mengekèt perpadanen perjejapen en mi lebbeMu. Bereken  mo pasu-pasuMu asa boi  kalak èn mengerasaken enggeluh perumahtanggan kalak èn ibagasen keleng atè engket damè, merkitèken pasu-pasuMu dekket mendè ni Kristus mercuhaya ibagasen rumahtangga kalak i. Mersodip mo kita,

Umat         :   Dengkohken mo Tuhan sodip nami èn.

Petugas     :   Alè Tuhan bereken mo tanganMu lako mendengani rumahtangga sirembaru èn. Mersodip mo kita,

Umat         :   Dengkohken mo Tuhan sodip nami èn

Petugas     :   Dak tong mo kalak èn enggeluh ibagasen keleng ni atè janah enggeut mendahi deket mengulaken simende mendahiken jelma sidèban. Mersodip mo kita,

Umat         :   Dengkohken mo Tuhan Sodip nami èn.

Petugas     :   Bereken mo ntedoh mendahi kalak èn janah bereken mo mendahi kalak èn anak dekket berru janah merkininjuah. Mersodip mo kita,

Umat         :   Dengkohken mo Tuhan sodip nami en.

Petugas     :   Pasu-pasu mo orangtua engket karina family karina sienggo jejap èn, asa merlolo ni atè janah oda merniletja kisodipken janah  mendengani rumahtangga sirembaru èn. Mersodip mo kita,

Umat         :   Dengkohken mo Tuhan sodip nami èn.

Petugas     :   Perimbaru mo karina rumahtangga siroh isèn bagèndari pasu-pasu sienggo i janjiken Ko ibagasen perpadanen perjejapèn. Mersodip mo kita

Umat         :   Dengkohken mo Tuhan Sodip nami èn.

Pastor       :   Alè Debata simerkuaso, ramoti mo akka dengan nami èn ibagasen kelleng ni rokaMi, asa Ko dak tong menongketi dekket mendengani kalak èn i sindekah enggeluhna; janah embah mo kalak èn  mi kesenangen simenenteng soh mi aman sumendah.

Umat         :   Amèn.

2. Endè dekket pesakatken siluah

3. Sodip pesakatken siluah

Pastor       :   Mersodip mo kènè alè dengan, asa Tuhan simerkuasa memasu-masu luahta èn.

Umat         :   Dak i jalo Tuhan imo pelenta èn memaing kesangapen deket kemulian deket karina umat ni Debata.

Pastor       :   Ale Tuhan, uè i mo sodip nami èn janah jalo mo pèlèn nami èn kubereken kami bamu dekket duana pengantin èn, kerna enggo i i pèsada Kono kalak èn ibagasen perjejapen. Merkiteken ulan Simbadia èn kalak en makin mersikekelengen  dekket mengkekelengiKo. Merkiteken Kristus Tuhan simendengani kami.

Umat         :   Amèn.

4. Prefasi  

Pastor       :   Tuhan i mendengani kita,

Umat         :   Bagèndari soh mi sidekah ni dekahna

Pastor       :   Dempak dates mo ukurta

Umat         :   Enggo tutus ukurta dempak Tuhan i

Pastor       :   Mendokken lias atè mo kita mi Tuhan Dèbatanta,

Umat         :   Patut janah tuhu ngo i,

Pastor       :   Kennah janah patut ngo kami, alè Pa Simerkuasa, Tuhan sidekah ni dekahna janah merkuasa, marang idikè pè kami kennah mendokken lias atè mendahi Ko merkiteken Kristus Tuhan nami. Merkiteken Ko, Ko ngo mengajari kami jelma mi kenggeluhen sidekah ni dekahna, ibagasen Ia Ko memaing Sakramen Perjejapen imo kelleng ni atè, imo tanda kesadan Tuhan dekket GerèjaNa. Makin tangkas mo kelengMu mendahi GerejaMu. Karina dukak si enggo tubuh ibagasen perjejapen si enggo i pasu-pasu Ko; ibaing Ko ngo gabè dukak-dukakMu dekket perjambar i kerajaan sorga. Rebak Simbadia sini sorga, kami dak tong memoji Ko janah oda mengadi-adi pesangapken kemulianMu janah merlolo ni atè dekket merendè :

5. Simbadia

Simbadia, simbadia, simbadia ngo Tuhan Debata si gemgem kesiangan en, Dom kelulianmu ngo, imo langit deket tanoh en. Hosanna mo si ni sorga. Ipasu-pasu mo si roh, i bagasen gerar ni Tuhan i. Hosanna mo si ni Sorga.

6. Sodip Mbellin

Pastor       :   Sini poji mo Ko alè Bapa, benna ni karina Simbadia. Kami mengido dak tong mo kuasoMu pemendèken pèlèn nami èn, Asa gabè daging mendahi kami tubuh engket daroh ni anakMu permende basa Tuhan nami Jesus Kristus.

 I berngin nderang madèng i pesoh diriNa lako menjalo sitahanenNa, i buat Jesus mo Roti mendokken lias ate mo Ia baMu merdengan pemoji-mojin. I penggeli mo roti i, i bereken mo i mendahi sisinNa janah idokken :

JALO KENE JANAH PANGAN KENE MO, EN MO DAGINGKU SINIPESOH KUMEPKEP KENE.

 enggo kessa sidung perpulungen i, i buat mo pengenumen i mendokken lias atè nola mo Ia mendahi Ko merdengan pemoji-mojin, ibereken mo taba sisinNa, janah mendokken :

                     JALO KENE JANAH ENUM KENE MO, EN MO PENGENUMEN SIMERISI DAROHKU, DAROH SIPEJENG-JENGKEN PADAN SIREMBARU JANAH SIDEKAH NI DEKAHNA, SINI DURUSKEN NGO I KUMEPKEP KENE DEKKET SINTEREM, LAKO MENESA DOSA, ULAKEN KENE MO I LAKO MERNENGET AKU.

Pastor       :   En mo benna ni permenden karina kepercayan i,

Umat         :   Tuhan, Ko enggo matè, Tuhan bagèndari enggo Kono enggeluh Ko ngo juru selamat, roh mo Ko alè Tuhan Jèsus.

Pastor       :   Lako mernenget permateMu dekket perkekeMu Kristus, kami memelèken taba Kono, alè Bapa roti kenggeluhen dekket pengenumen asa boi maluah kami. Kami mendokken lias atè bamu kerna i padue Ko kami boi mersembah bamu, dekket pesangapken Kono. Kami mengido, asa kami simenjalo daging dekket daroh ni Kristus, i pesada dekket Tendi Simbadia gabè umatMu.

 Alè Bapa, pasu-pasu mo GerèjaMu si lot i babo tanoh èn, asa boi sada kata karina umatMu dekket memaing keleng janah mersada Bapa Simbadia…………………………..dekket Uskup nami……………………… dekket pengendeng ni kuria karinana. Tegu mo karina dengan nami, sipercaya dekket karina si enggo kumellip.  Baing mo bekkas simende bai kalak i, dekket karina jelma si enggo kumellip ibagasen Kristus. Kekelengi janah jalo mo kalak i igembarMu.  Kami mengido masèh atèMu, alè Bapa terlebih mendahi keluarga sirembaru èn dekket mendahi kami karina, asa boi kami merjambar ibagasen lolo ni atè simendè, engket Santa Maria sioda mertikas asalna, inang ni Tuhan, dekket karina Rasul dekket karina kalak Simbadia, singgeluh ibagasen kelleng ni atèMu, baing mo kami memoji engket pesangapken Ko.

Merkiteken Kristus rebbak engket Ia mersada ibagasen Tendi Simbadia, kami pesakatken bamu, Tuhan simerkuasa, karina sembah ujud dekket pemojin nami bagendari soh mi sidekah ni dekahna, Amèn.

7. Bapa Nami

Pastor       :   Kènè dengan sini kekelengen, enggo tajalo Tendi Perbadia i si mengabin kita jadi anak ni Dèbata asa ibagasen Tendi i rebak mo kita mersodip :

Umat         :   Bapa nami sini sorga, dak niperbadia mo gerarMu, dak roh mo KerajanMu, dak saut mo lemo atèMu i banua tengah èn, bagè sini sorga. Berèken mo bai nami sidari èn panganen nami sigenep ari, janah sasa mo salah nami, bagè penasa nami, mi simersalah dempak kami, janah ulang mo uluken kami mi pengojin, tapi peluah mo kami bai pengago nai.

8. Embolismè

Pastor       :   Alè Bapa, i pesangap mo gerarMu ibagasen kerèjo dekket perulan nami sigenep ari, ibagasen keluarga dekket masyarakat nami, urupi mo kami asa boi kami mengulaken enggeluh nami dekket memoji gerarMu, dekket kipema sipaluah kami Jèsus Kristus.

Umat         :   Ko ngo Raja simersangap janah merkuasa, soh mi sidekah ni dekahna.

Pastor       :   Merkitèken damè ni Tuhanta Jesus Kristus dak tong mendengani kita.

Umat         :   Bagèndari soh mi sidekah ni dekahna.

9. Anak biri-biri ni Dèbata (marang i endèken)

10. Komuni

Pastor  :   Kènè karina dengan, i dokken Jèsus  ngo, “Roh mo kènè siletja janah simbotong, asa kupesenang kènè. Dapetten pasu-pasu mo karina sini arahken biri-biri i,

Umat   :   Alè Tuhan oda pantas aku menjalo Kono, tapi dokken mo kataMu gabè mendè mo aku noposoMèn.

                      (Menjalo Komuni. pengantin perjolo menjalo komuni dua rupa)

VI. LITURGI  PENUTUP

1. Doa Penutup

Pastor       :   Mersodip mo kita,

Alè Tuhan, ibas ari simende èn enggo i pepulung Kono kami ibas Gereja èn lako menengen perjejapen kalak sidua. Pasu-pasu mo janah dengani mo kalak èn ibagasen kesadan simende ibagasen gerarMu, asa dak tong kalak èn i bagasen gerar simende sada ukur janah sada kata ibagasen kelleng atè dekket menguei  kataMu janah enggeut pejejengken kepercayan mendahi dengan sidèban. Merkitèken Kristus Tuhan nami janah mendengani kami.

Umat         :   Amèn.

2. Mengido pasupasu/kipasu-pasu buku simbadia dekket silang mula lot

Pastor       :   Mersodip mo kita,

                     Alè Bapa janah Tuhan nami, pasu-pasu mo buku Simbadia èn (+) asa boi i pakkè dengan nami è………………dekket………………merkitèken kata ni Tuhan silot ibagasen buku èn asa menjadi dalan janah nterang ibagasen ripè kalak èn, terlebih nderang ibas kesusahen dekket bonek, janah bagima dekket silang èn (+) asa gabè tanda perkiroh janah idengani Kono ibagasen ripè kalak èn, memerèken kegegohen mendahi kalak èn terlebih lako mengulaken kataMu. Merkitèken Kristus Tuhan simendengani kami.

Umat         :   Amèn.

3. Tangiang mendahi Santa Maria

Pastor       :   Kènè karina, aturen perjejapen èn enggo sidung, bagèndari kalak èn sidua mersodip mengido pengurupi asa i dengani merkitèken sodip inangta Santa Maria.

(Pengantin dua-duana mendahi patung Santa Maria janah mersodip dua-duana)

TANGIANG MENDAHI   BUNDA  MARIA

                     Alè Bunda Maria, inang ni Jesus dekket inang nami sini kekelengen, tengen mo kami sidua simerlolo ni atè èn. Oda boi kudokken kami lias ate bamu kerna bagimo maseh ni ateMu si enggo kujalo kami. Kubettoh kami ngo perdalanen nami ndaoh kalak en deng, i lebbe nami mbue deng ngo taki-taki, susah mendele dekket gemgem, kerna ni i ale nange mengidoken sodipMu asa boi kami meniru ripe Simbadia i Nazaret, mersampang ni ate dekket dame dekket nduma.

                     Ale Inang, pesenget mo kami nderang lupa kami, janah kurang mersiantusen janah boi menjaga diri nami, baing mo kami mersampang ni ate, nderang pengunjunen  i enggeluh nami, pehot mo kepercayan nami tikki kegelapen kami , tikki roh kesusahen taba kami, tegu-tegu mo kami lako kiajar-ajari dukak-dukak nami kaduan, asa boikami kibereken ukur dekket keleng ate, memereken codin enggeluh simende. Mula mbalang keleng nami, Kono mo dak tong ale Inang simende ukur dak tong kisodipken kami mendahi AnakMu, Tuhan nami Jesus Kristus. Amen 

 Doa Sintabi Maria  (3 kali)

                     Sintabi bamu, Maria dom masih ate, i dengani Tuhan i ngo Ko, Ko ngo dapetten pasu-pasu i kumerna sinasa daberru janah ipasu-pasu ngo buah bertinMu Jesus.

                     O Maria Simbadia, Inang ni Debata, tangiangken mo kami, siperdosa en, bagendari soh mi  ari kememate nami, Amen.

(Enggo kessa i pengantin mulak mi bekkas kundukna kin)

4. Menekken surat-surat perjejapen

(Pengantnin dekket saksi menekken surat-surat perjejapen, nderang bagidi boi mo mendokken sengkebabah dua kebabah kata, bai keluarga pengantin

5. Pasu-pasu penutup

Pastor       :   Partua-partua sini kekelengen, enggo sidung ulan pesta en  sipengido mo pasu-pasu-pasu ni Tuhan i, terlebih mendahi kalak  èn sidua simersampang ni atè èn.

Pastor       :   Dak tong mo Bapa permendè basa i memerèken masèh atèNa mendengani kènè sidua keleng ni atèNa dekket damèNa merkitèken damè ni Kristus dak tong merbekkas ibagasen ripè ndènè sidua.

Umat         :   Amèn.

Pastor       :   Dèbata Bapa permasèh ni atè memerèken masèh ni atèNa janah pehotken kesadan ndènè sidua dekket memerèken damèNa mendahiken kènè sidua janah dak i pasu-pasu mo kènè merkitèken keleng atèNa dekket dukak-dukak ndene, merlolo ni atè dekket dengan-dengan, janah merdengan taba karina jelma.

Umat         :   Amèn

Pastor       :   Dak tong mo Debata Bapa menegu-negu, janah mendengani dekket memasu-masu kita karinana terlebih ripè sirembaru èn. Ibagasen Gerar ni Bapa dekket Anak dekket Tendi Simbadia.

Umat         :   Amèn.

Pastor       :   Upacara perjejapen èn enggo sidung.

Umat         :   Lias atè mo mendahi Debata

6. Lagu Penutup

(Mula naing merggambar pengantin engket pastor, i baing tikki nderang madeng mersisalamen)

Pahar piring i tukkangi ijakarta
Mahar ari berngin Tuhanta mendengani kita

Menangkih mo sisakkeus i batang kayu ara
Maseh ate ni Tuhanta Jesus Kristus dak mendengani kita

Tuppak simerpara ruah-ruah dahan parira
Menumpak mo Tuhan permaseh ni ate iperkininjuah mo kita karina

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: